തൃശൂര്: ഡിസിസി വൈസ് പ്രസിഡന്റ് ഡോ. നിജി ജസ്റ്റിന് തൃശൂര് മേയറാകും. കെപിസിസി സെക്രട്ടറിയായ എ പ്രസാദ് ഡെപ്യൂട്ടി മേയറുമാകും. പാര്ട്ടിയുടെയും കൗണ്സിലര്മാരുടെയും അഭിപ്രായം കണക്കിലെടുത്താണ് തീരുമാനമെന്ന് തൃശൂര് ഡിസിസി പ്രസിഡന്റ് ജോസഫ് ടാജറ്റ് വാര്ത്താസമ്മേളനത്തില് പറഞ്ഞു.
തവണ വ്യവസ്ഥ സംബന്ധിച്ച് പിന്നീട് അറിയിക്കുമെന്നും ഇപ്പോള് സ്ഥാനാര്ത്ഥിയെ പ്രഖ്യാപിക്കുകയാണെന്നും ജോസഫ് ടാജറ്റ് കൂട്ടിച്ചേര്ത്തു. ഉചിതമായ തീരുമാനം അതാത് സമയത്ത് ഉണ്ടാകും. ആരെയും ഒഴിവാക്കിയിട്ടില്ല. 19 വനിതാ കൗണ്സിലര്മാരുണ്ട്. എല്ലാവരും അര്ഹരാണ്. എന്നാല് മാനദണ്ഡങ്ങള് എല്ലാം അനുസരിച്ചാണ് തീരുമാനം. എല്ലാ കാര്യങ്ങളും പരിഗണിച്ചാണ് കൂട്ടായി ഒരു പേരിലേക്ക് എത്തിയതെന്നും ജോസഫ് ടാജറ്റ് വ്യക്തമാക്കി. പാര്ലമെന്ററി പാര്ട്ടിയുടേതാണ് തീരുമാനമെന്നും അദ്ദേഹം കൂട്ടിച്ചേര്ത്തു.
ക്രിസ്മസ് ദിനത്തില് തന്നെ ഇത്തരത്തില് ഒരു സന്തോഷ വാര്ത്ത വന്നതില് സന്തോഷമുണ്ട്. കിഴക്കുംപാട്ടുകരയിലെ വോട്ടര്മാര്ക്ക് നന്ദിയുണ്ടെന്നും കോര്പ്പറേഷനില് കൂട്ടായ പ്രവര്ത്തനം ഉണ്ടാകുമെന്നും നിജി ജസ്റ്റിന് പറഞ്ഞു. 100 വര്ഷത്തിന് ശേഷമാണ് തൃശൂര് കോര്പ്പറേഷന് അധ്യക്ഷ സ്ഥാനത്തേക്ക് ഒരു ഡോക്ടര് എത്തുന്നത്. അതും ഇരട്ടി മധുരമാണ്. 5 വര്ഷം കൊണ്ട് തൃശൂര് നഗരത്തിന്റെ വികസനത്തിന് പുതിയ മുഖം ഉണ്ടാകുമെന്നും നിജി ജസ്റ്റിന് കൂട്ടിച്ചേര്ത്തു
