തിരുവനന്തപുരം: ആഗോള അയ്യപ്പ സംഗമം നടത്തിയതില് തിരുവിതാംകൂര് ദേവസ്വം ബോര്ഡിന് 3.4 കോടി രൂപയുടെ നഷ്ടം ഉണ്ടായെന്ന ഓഡിറ്റ് റിപ്പോര്ട്ട് ഹൈക്കോടതിയില് സമര്പ്പിച്ചു. അയ്യപ്പ സംഗമത്തിന് വേണ്ടി ഒരു രൂപ പോലും സര്ക്കാരില് നിന്നോ ദേവസ്വം ബോര്ഡില് നിന്നോ കൈപ്പറ്റാന് പാടില്ലെന്നായിരുന്നു കോടതിയുടെ നിര്ദേശം. അയ്യപ്പ സംഗമത്തിന് വേണ്ട പണം സ്പോണ്സര്ഷിപ്പിലൂടെ കണ്ടെത്താമെന്നായിരുന്നു ദേവസ്വം ബോര്ഡ് പ്രതീക്ഷിച്ചിരുന്നത്. ഏകദേശം എട്ടു കോടി രൂപ ചിലവ് വരുമെന്ന് ദേവസ്വം വകുപ്പ് മന്ത്രി തന്നെ വാര്ത്താ സമ്മേളനത്തില് പറഞ്ഞിരുന്നു. എന്നാല്, ഈ തുക മുഴുവന് സ്പോണ്സര്ഷിപ്പിലൂടെ കണ്ടെത്താന് കഴിഞ്ഞോ എന്നതില് വ്യക്തതയില്ല. ദേവസ്വം ബോര്ഡിന്റെ സര്പ്ലസ് ഫണ്ടില് നിന്നാണ് 3.4 കോടി രൂപ നല്കിയിരിക്കുന്നത്.
ഇതിനിടെ പമ്പയില് നടന്ന ആഗോള അയ്യപ്പ സംഗമവും എസ്ഐടിയുടെ അന്വേഷണ പരിധിയിലേക്കെന്ന് സൂചിപ്പിക്കുന്ന വിവരങ്ങള് പുറത്ത്. ശബരിമല സ്വര്ണക്കൊള്ള കേസുമായി ബന്ധപ്പെട്ട് ഹൈക്കോടതിയില് എസ്ഐടി നല്കിയ റിപ്പോര്ട്ടില് ആഗോള അയ്യപ്പ സംഗമത്തെക്കുറിച്ചും പരാമര്ശം. എസ്ഐടി റിപ്പോര്ട്ടില് സുപ്രധാന കണ്ടെത്തലുകളാണ് ഇതുമായി ബന്ധപ്പെട്ടുള്ളത്. പിഎസ് പ്രശാന്ത് ദേവസ്വം ബോര്ഡ് പ്രസിഡന്റായപ്പോള് നടന്ന ആഗോള അയ്യപ്പ സംഗമത്തെക്കുറിച്ചാണ് പരാമര്ശമുള്ളത്. അയ്യപ്പ സംഗമം തീരുമാനിച്ച വിവരം ദേവസ്വം യോഗത്തിന്റെ മിനുട്സില് ഇല്ലെന്നാണ് എസ്ഐടി റിപ്പോര്ട്ടില് പറയുന്നത്. ആഗോള അയ്യപ്പ സംഗമത്തിലെ ഫണ്ട് വിനിയോഗത്തിലെ അവ്യക്തകളും റിപ്പോര്ട്ടില് ചൂണ്ടികാട്ടിയിട്ടുണ്ട്. ആഗോള അയ്യപ്പ സംഗമവും പരാമര്ശിച്ച പശ്ചാത്തലത്തില് തിങ്കളാഴ്ച യോഗം വിളിക്കാനാണ് ദേവസ്വം ബോര്ഡിന്റെ തീരുമാനം.
സ്വര്ണക്കൊള്ളക്കേസ്: ആഗോള അയ്യപ്പ സംഗമവും അന്വേഷണപരിധിയില്. നഷ്ടം 3.4 കോടി ?
