ജയ്പൂര്‍: രാജസ്ഥാനില്‍ ജോധ്പൂര്‍ ഹൈവേയിലെ തായാത്ത് മേഖലയ്ക്ക് സമീപം സ്വകാര്യ ബസ്സിന് തീപിടിച്ച് 20 പേര്‍ മരിച്ചു. നിരവധി പേര്‍ക്ക് ഗുരുതര പൊള്ളലേറ്റു. ജയ്സാല്‍മീറില്‍ നിന്നും ജോധ്പൂറിലേക്ക് പോയ ബസ്സിനാണ് തീപിടിച്ചത്. ബസ്സ് യാത്ര ആരംഭിച്ച് 20 മിനിട്ടുകള്‍ക്ക് ശേഷമാണ് പിന്‍ഭാഗത്ത് നിന്ന് പുക ഉയര്‍ന്നതും പിന്നീട് തീ പടര്‍ന്നതും. ഇന്നലെയാണ് സംഭവം. അപകടത്തില്‍ ബസ് പൂര്‍ണമായും കത്തി നശിച്ചു. 57 യാത്രക്കാരാണ് എ സി ബസ്സില്‍ യാത്ര ചെയ്തിരുന്നത്. ഇതില്‍ തന്നെ 19 പേരുടെ മൃതദേഹങ്ങള്‍ കത്തിക്കരിഞ്ഞ നിലയില്‍ ബസ്സിനകത്ത് നിന്നുതന്നെ കണ്ടെത്തുകയായിരുന്നു. 16 പേര്‍ പരുക്കേറ്റ് ചികിത്സയിലാണ്. ഒരാള്‍ ആശുപത്രിയിലേക്ക് കൊണ്ടുപോകുന്നതിനിടെ മരണപെട്ടു. മൃതദേഹങ്ങള്‍ കത്തി കരിഞ്ഞ നിലയിലായതിനാല്‍ തിരിച്ചറിയാന്‍ കഴിഞ്ഞിട്ടില്ല. ഇവരുടെ ഡിഎന്‍എ പരിശോധനകള്‍ നടത്തും.
പിന്‍ഭാഗത്ത് നിന്ന് പുക ഉയര്‍ന്നതോടെ ബസ് നിര്‍ത്തി ആളുകളെ ഒഴിപ്പിക്കാന്‍ ശ്രമിച്ചെങ്കിലും തീ വേഗത്തില്‍ പടര്‍ന്നതാണ് ആളപായത്തിന് ഇടയാക്കിയത്. മരിച്ചവരുടെ കുടുംബാംഗങ്ങള്‍ക്ക് പ്രധാനമന്ത്രി നരേന്ദ്രമോദി രണ്ട് ലക്ഷം രൂപ ധനസഹായം പ്രഖ്യാപിച്ചു.
