തൃശൂര്‍: വോട്ടര്‍പട്ടികയില്‍ ക്രമക്കേട് നടത്തി മോദി സര്‍ക്കാര്‍ ജനാധിപത്യം അട്ടിമറിക്കുന്നതില്‍ പ്രതിഷേധിച്ച്്് 22 ന് തൃശൂരില്‍ യൂത്ത് കോണ്‍ഗ്രസ് ലോങ്ങ് മാര്‍ച്ച് നടത്തുമെന്ന് രാഹുല്‍ മാങ്കൂട്ടത്തില്‍ എംഎല്‍എ അറിയിച്ചു. ഭരണഘടന ആശയങ്ങളെല്ലാം ബിജെപി സര്‍ക്കാര്‍ അട്ടിമറിക്കുന്നുവെന്ന് രാഹുല്‍ ആരോപിച്ചു.
.മോദിയുടെ വിജയം പോലും വ്യാജ വോട്ടിലൂടെ എന്ന വിവരം പുറത്തുവരുന്നു.തൃശൂര്‍ കട്ടാണ് എടുത്തതെന്നും രാഹുല്‍ ആരോപിച്ചു.രാജ്യത്തെ ജനാധിപത്യ സംവിധാനങ്ങളെ അട്ടിമറിച്ച് വോട്ടുകച്ചവടത്തിന് കുടപിടിക്കുന്ന തിരഞ്ഞെടുപ്പ് കമ്മിഷനെതിരെശക്തമായ പ്രതിഷേധവും രാഹുല്‍ ഗാന്ധിക്ക് ഐക്യദാര്‍ഢ്യവും പകര്‍ന്നാണ് യൂത്ത് കോണ്‍ഗ്രസ് ചീഫ് ഇലക്ടറല്‍ ഓഫിസിലേക്ക് മാര്‍ച്ച് നടത്തിയതെന്നും രാഹുല്‍ മാങ്കൂട്ടത്തില്‍ പറഞ്ഞു.
വോട്ട് കൊള്ളയ്ക്കെതിരെ ചീഫ് ഇലക്ട്രല്‍ ഓഫീസിലേക്ക് ഇന്ന് യൂത്ത് കോണ്‍ഗ്രസ് തിരുവനന്തപുരത്ത് പ്രതിഷേധ മാര്‍ച്ച് നടത്തി. യൂത്ത് കോണ്‍ഗ്രസ് പ്രസിഡന്റ് രാഹുല്‍ മാങ്കൂട്ടത്തില്‍ മാര്‍ച്ച് ഉദ്ഘാടനം ചെയ്തു. പാളയം രക്തസാക്ഷി മണ്ഡപത്തില്‍ നിന്ന് ആരംഭിച്ച മാര്‍ച്ച് നിയമസഭാ മന്ദിരത്തിനു മുന്നില്‍ പൊലീസ് തടയുകയായിരുന്നു.
പൊലീസും പ്രവര്‍ത്തകരും തമ്മില്‍ ഉന്തും തള്ളും ഉണ്ടാവുകയും പല തവണ ജലപീരങ്കി പ്രയോഗിക്കുകയും ചെയ്തു. രാജ്യത്താകമാനം നടക്കുന്ന വോട്ട് മോഷണത്തിനെതിരെയാണ് സംസ്ഥാനത്ത് യൂത്ത് കോണ്‍ഗ്രസ് പ്രതിഷേധിച്ചത്.
