തൃശൂര്‍: കേരളത്തിലെ ചെറുതും, വലുതുമായ ക്ഷേത്രങ്ങളിലെ സഖാക്കളുടെ നേതൃത്വത്തിലുള്ള മുഴുവന്‍ അമ്പലക്കമ്മിറ്റികളും പിരിച്ചുവിടണമെന്ന നിര്‍ദേശം നല്‍കാന്‍ സി.പി.എം നേതാവ് എം.വി..ഗോവിന്ദന്‍ ആര്‍ജവം കാട്ടണമെന്ന് ബി.ജെ.പി സംസ്ഥാന വൈസ് പ്രസിഡണ്ട് ശോഭാ സുരേന്ദ്രന്‍ ആവശ്യപ്പെട്ടു. തൃശൂരില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അവര്‍.
ഗണപതി ഭഗവാനെ അംഗീകരിക്കാത്ത സഖാക്കള്‍ അമ്പലക്കമ്മിറ്റികളില്‍ എന്തിനാണെന്ന് അവര്‍ ചോദിച്ചു. ശാസ്ത്രത്തില്‍ മാത്രം വിശ്വസിക്കുന്നവര്‍ ക്ഷേത്രഭരണത്തില്‍ നിന്ന് പിന്‍മാറണം. എല്ലാ ക്ഷേത്രങ്ങളിലും പൂജ തുടങ്ങുന്നത് ഗണപതിഹോമത്തിന് ശേഷമാണ്.
ഗണപതി നിന്ദ ഷംസീറിന് പറ്റിയ അബദ്ധമല്ല. സി.പി.എം സംസ്ഥാന നേതൃത്വത്തിന്റെ ഗൂഢാലോചനയുണ്ടിതിന് പിന്നില്‍. ശബരിമലയിലേക്ക് ഒരു കൂട്ടം സ്ത്രീകളെ മലകയറ്റാന്‍ കൊണ്ടുവന്നതിന്റെ സൂത്രധാരന്‍ ഷംസീറായിരുന്നു. കണ്ണൂര്‍ തലശ്ശേരിയില്‍ നടന്ന യോഗത്തില്‍ ഷംസീറും ഗോവിന്ദന്‍ മാഷും പങ്കെടുത്തിരുന്നു. ഗോവിന്ദന്‍ മാഷും ഷംസീറും ഒരുമിച്ച് ചിന്തിച്ചെടുത്ത തീരുമാനമായിരുന്നു അത്.
മതനിന്ദ നടത്താന്‍ സ്പീക്കര്‍ക്ക് ആരാണ് അനുവാദം നല്‍കിയതെന്നും അവര്‍ ചോദിച്ചു. മതേതരസമൂഹത്തില്‍ എല്ലാവര്‍ക്കും അവരുടേതായ മതിവിശ്വാസം ഉണ്ട്. മതവിശ്വാസത്തെ ചോദ്യം ചെയ്യാന്‍ ഷംസീര്‍ സ്പീക്കര്‍ പദവി ദുരുപയോഗം ചെയ്തുവെന്നും അവര്‍ ആരോപിച്ചു.
ഇസ്ലാം മതവിശ്വാസികളെ ഇളക്കിവിട്ട് ഹിന്ദു, മുസ്ലീം ചേരിപ്പോരിനാണ് ശ്രമം. ഇവിടെ ഇസ്ലാമും, ഹൈന്ദവരും അവരുടെ മതവിശ്വാസങ്ങളെ മാനിക്കുന്നവരാണ്. ഇവിടെ വര്‍ഗീയ ചേരിതിരിവിന് ശ്രമിച്ചാല്‍ ഗോവിന്ദനും, കൂട്ടര്‍ക്കും കൂടെ കൂട്ടാന്‍ കഴിയുക ഇസ്ലാം തീവ്രവാദികളെ മാത്രമായിരിക്കുവെന്നും അവര്‍ പറഞ്ഞു. കേരളത്തിലെ ഇസ്ലാം കുടുംബങ്ങള്‍ ഭീകരവാദം ആഗ്രഹിക്കുന്നവരല്ലെന്നും അവര്‍ കൂട്ടിച്ചേര്‍ത്തു.
ഗണപതിനിന്ദ:സഖാക്കളെ അമ്പലക്കമ്മിറ്റികളില്‍ നിന്ന് പിന്‍വലിപ്പിക്കണമെന്ന് ശോഭാ സുരേന്ദ്രന്‍
