തിരുവനന്തപുരം: വര്ക്കലയില് ട്രെയിനില് നിന്നും പെണ്കുട്ടിയെ തള്ളിയിട്ട സംഭവത്തില് കുറ്റം സമ്മതിച്ച് പ്രതി സുരേഷ് കുമാര്. ട്രെയിനിന്റെ വാതില്ക്കല് നിന്നും പെണ്കുട്ടി മാറിയില്ലെന്നും ഇതിന്റെ ദേഷ്യത്തില് ചവിട്ടിയിട്ടുവെന്നുമാണ് പ്രതി സുരേഷിന്റെ മൊഴി. പിന്നില് നിന്നുമാണ് ചവിട്ടിയത്. ഒറ്റക്കാണ് യാത്ര ചെയ്തിരുന്നതെന്നും പ്രതി മൊഴിയില് വ്യക്തമാക്കി. പ്രതിക്ക് മുമ്പ് കേസുണ്ടോയെന്ന് പരിശോധിക്കുന്നതായി പൊലീസ് അറിയിച്ചു. കസ്റ്റഡിയിലുളള പ്രതി സുരേഷ് പെണ്കുട്ടിയെ തള്ളിയിട്ടത് തന്നെയെന്ന് റെയില്വേ പൊലീസും സ്ഥിരീകരിച്ചു. ഇയാള് കോട്ടയത്ത് നിന്നും മദ്യപിച്ചാണ് ട്രെയിനില് കയറിയത്. ശുചിമുറി ഭാഗത്തായിരുന്നു നില്പ്പ്. പ്രത്യേകിച്ചൊരു പ്രകോപനവുമില്ലാതെയായിരുന്നു ആക്രമണമെന്നും സ്ഥിരീകരണമുണ്ട്.
അറസ്റ്റ് രേഖപ്പെടുത്തിയ പ്രതിയെ കോടതിയില് ഹാജരാക്കും. ഇന്നലെ കസ്റ്റഡിയിലെടുത്ത സമയത്ത് സംഭവത്തിലെ പ്രതി താനല്ല എന്ന് സ്ഥാപിക്കാനുള്ള ശ്രമം ഇയാള് നടത്തിയിരുന്നു. അമിതമായി മദ്യപിച്ച് ട്രെയിനില് കയറിയ സുരേഷ് കുമാര് ശുചിമുറിയുടെ ഭാഗത്താണ് നിന്നിരുന്നത്. പെണ്കുട്ടിക്കൊപ്പമുണ്ടായിരുന്ന സുഹൃത്ത് ശുചിമുറിയിലേക്ക് പോയ സമയത്താണ് പെണ്കുട്ടിക്ക് നേരെ അതിക്രമമുണ്ടായത്.
യുവതിയെ ട്രെയിനില് നിന്ന് തള്ളിയിട്ട സംഭവം: കുറ്റം സമ്മതിച്ച് പ്രതി
