ന്യൂഡല്ഹി: നിയമസഭാ കൈയ്യാങ്കളി കേസില് കേരള സര്ക്കാരിന് വന് തിരിച്ചടി. . കേസ് പിന്വലിക്കാന് അനുവദിക്കണമെന്ന ആവശ്യം സുപ്രീംകോടതി തള്ളി.ഇതോടെ വിദ്യാഭ്യാസമന്ത്രി വി.ശിവന്കുട്ടി, കെ.ടി. ജലീല് എം.എല്.എ., മുന് എം.എല്.എമാരായ കെ.കുഞ്ഞമ്മദ്, ഇ.പി. ജയരാജന്, സി.കെ. സദാശിവന്, കെ.അജിത്ത് എന്നിവരടക്കം കൈയ്യാങ്കളി കേസില് പ്രതികളായ ആറ് നേതാക്കളും വിചാരണ നേരിടേണ്ടി വരും. സുപ്രീംകോടതി വിധിയുടെ പശ്ചാത്തലത്തില് തിരുവനന്തപുരം സി.ജെ.എം. കോടതിയില് നിയമസഭാ കൈയ്യാങ്കളി കേസിന്റെ വിചാരണ പുന:രാരംഭിക്കും. നിയമസഭാംഗം എന്ന പരിരക്ഷ ക്രിമിനല് കുറ്റം ചെയ്യാനുള്ള പരിരക്ഷയല്ലെന്ന് വ്യക്തമാക്കിയാണ് കേസ് പിന്വലിക്കാനുള്ള സംസ്ഥാന സര്ക്കാരിന്റെ ആവശ്യം ജസ്റ്റിസ് ഡി.വൈ. ചന്ദ്രചൂഢ് തള്ളിയത്.
ജസ്റ്റിസ് ഡി.വൈ. ചന്ദ്രചൂഡ്, എം.ആര്. ഷാ എന്നിവരടങ്ങിയ ബെഞ്ചാണ് കേസ് പരിഗണിച്ചത്. കയ്യാങ്കളി കേസ് അവസാനിപ്പിക്കാന് അനുമതി തേടി സര്ക്കാര് നല്കിയ ഹര്ജിയിലാണ് വിധി. നിയമസഭയ്ക്കുള്ളില് പൊതുമുതല് നശിപ്പിച്ച കേസ് പിന്വലിക്കാന് സര്ക്കാരിന് സാധിക്കില്ലെന്ന് കേസില് വാദം കേള്ക്കവെ കോടതി നേരത്തെ വ്യക്തമാക്കിയിരുന്നു. കേസ് അവസാനിപ്പിക്കാന് എന്ത് പൊതുതാല്പ്പര്യമെന്ന ചോദ്യവും കോടതി ഉയര്ത്തിയിരുന്നു.
Photo Credit: Twitter
