തൃശൂർ: പുതുതലമുറ സിന്തറ്റിക് മയക്കുമരുന്ന് എം.ഡി.എം.എ (MDMA) യുമായി ഒരു സ്ത്രീയടക്കം മൂന്നുപേർ പിടിയിൽ. ഊരകം ഇടക്കാട്ടുപറമ്പിൽ സഞ്ജുന രാജൻ (28), പൂത്തോൾ തേറാട്ടിൽ മെബിൻ (29), ചേറൂർ പുതിയവീട്ടിൽ കാസിം (28) എന്നിവരാണ് ഈസ്റ്റ് പോലീസിന്റെ പിടിയിലായത്.
വാടാനപ്പിള്ളിയിൽ പ്ലാനറ്റ് ഹോളിഡേയ്സ് എന്ന ട്രാവൽ ഏജൻസി നടത്തിവരികയാണ് സഞ്ജുന. ബാംഗ്ലൂരിൽ ഇടക്കിടെ പോയിവരുന്ന ഇവർ അവിടെ നിന്നുമാണ് മയക്കുമരുന്ന് എത്തിച്ച് വിപണനം നടത്തുന്നത്. പിടിയിലായവരിൽ മെബിൻ എന്നയാൾ ടാറ്റൂ പതിപ്പിക്കുന്ന രാസവസ്തു കച്ചവടം നടത്തുന്നതിന്റെ മറവിലാണ് മയക്കുമരുന്ന് ഉപഭോക്താക്കളെ കണ്ടെത്തുന്നത്. പിടിയിലായവർ നിരവധി തവണ മയക്കുമരുന്ന് കടത്തി വിൽപ്പന നടത്തിയതായി പോലീസിന് രഹസ്യവിവരം ലഭിച്ചിരുന്നു. ഇവർ മൂന്നുപേരും മയക്കുമരുന്ന് സ്ഥിരമായി ഉപയോഗിക്കുന്നവരുമാണ്.
മയക്കുമരുന്നുമായി ബാംഗ്ലൂരിൽ നിന്നും തൃശൂരിലേക്ക് വരുന്നുണ്ടെന്ന രഹസ്യ വിവരത്തെത്തുടർന്ന് നടത്തിയ പരിശോധനയിലാണ് ഇവർ സഞ്ചരിച്ചിരുന്ന ആഢംബര കാർ സഹിതം തൃശൂർ കിഴക്കേക്കോട്ട ഭാഗത്തുനിന്നും ഈസ്റ്റ് എസ്.എച്ച്.ഓ പി. ലാൽകുമാറും, തൃശൂർ സിറ്റി പോലീസ് മയക്കുമരുന്ന് വിരുദ്ധ വിഭാഗവും ചേർന്ന് ഇവരെ പിടികൂടിയത്. പിടിച്ചെടുത്ത അതിമാരക മയക്കുമരുന്നിന് ചില്ലറ വിപണിയിൽ രണ്ടുലക്ഷത്തിലധികം രൂപ വിലവരും.
അന്വേഷണ സംഘാംഗങ്ങൾ. ഈസ്റ്റ് പോലീസ് സ്റ്റേഷൻ SHO പി. ലാൽകുമാർ, സബ് ഇൻസ്പെക്ടർ ഗീതുമോൾ, അസി. സബ് ഇൻസ്പെക്ടർ ജിനികുമാർ, ഷാഡോ പോലീസ് സബ് ഇൻസ്പെക്ടർമാരായ എൻ.ജി. സുവ്രതകുമാർ, പി.എം. റാഫി, പി.രാഗേഷ്, കെ.ഗോപാലകൃഷ്ണൻ, സിവിൽ പോലീസ് ഓഫീസർമാരായ പഴനിസ്വാമി, ജീവൻ, വിപിൻദാസ്, ലിഗേഷ്, സുജിത് കുമാർ, ശരത്.
