തൃശൂര്: ‘ഓപ്പറേഷന് ഷോര്ട്ട് സര്ക്യൂട്ട്’ കെഎസ്ഇബി ഓഫീസുകളിലെ വിജിലന്സ് മിന്നല് പരിശോധനയില് വ്യാപക ക്രമക്കേട് കണ്ടെത്തി. ഉദ്യോഗസ്ഥരില് നിന്നും 16,50,000 രൂപ പിടിച്ചെടുത്തു. കരാര് നല്കുന്നതില് വിജിലന്സ് ക്രമക്കേട് കണ്ടെത്തി.’ഓപറേഷന് ഷോര്ട്ട് സര്ക്യൂട്ട്’ എന്ന പേരില് 70 സെക്ഷന് ഓഫിസുകളിലാണ് പരിശോധന നടന്നത്.
പലയിടത്തും ക്രമക്കേടുകള് കണ്ടെത്തിയതായാണ് സൂചന. കരാര് ജോലികളുടെ ടെന്ഡര് അനുവദിക്കുന്നതില് ഉദ്യോഗസ്ഥരുടെ ഒത്താശയോടെ വ്യാപക ക്രമക്കേടും സ്വജനപക്ഷപാതവും നടന്നുവരുന്നതായി വിജലന്സിന് പരാതി ലഭിച്ചിരുന്നു. കരാറുകാരില്നിന്ന് കമീഷന് ഇനത്തില് പണംപറ്റുന്ന ചില ഉദ്യോഗസ്ഥര് കരാര് പ്രവര്ത്തികളില് യഥാവിധി പരിശോധന നടത്താതെ ബില് മാറി പണം അനുവദിക്കുന്നതായി വിവരം കിട്ടി.ഇതുമായി ബന്ധപ്പെട്ട ഫയലുകള് വിജിലന്സ് സംഘം പരിശോധിച്ചു.
ഉപഭോക്താക്കളുടെ വൈദ്യുതി ഉപഭോഗം കണക്കാക്കുന്നതിനുള്ള മീറ്റര് റീഡിങ്ങില് കൃത്രിമം നടത്തി അനധികൃത കിഴിവുകള് നല്കല്, ഇത് കണ്ടെത്താതിരിക്കാന് എനര്ജി മീറ്ററുകള് തകരാറിലാക്കുകയോ തകരാറായതായി കാണിച്ച് മാറ്റിസ്ഥാപിക്കുകയോ ചെയ്യല് എന്നിവ സംബന്ധിച്ച പരാതികളിലും അന്വേഷണം നടത്തി. ക്രമക്കേടുകള് കണ്ടെത്താന് അടിയന്തിര പരിശോധന നടത്താന് നടത്താന് വിജിലന്സ് ഡയറക്ടര് മനോജ് എബ്രഹാമാണ് നിര്ദേശം നല്കിയത്.
‘
