തിരുവനന്തപുരം: ശബരിമല സ്വര്ണക്കടത്തില് ദേവസ്വം ബോര്ഡ് അംഗങ്ങള്ക്കും ജീവനക്കാര്ക്കുമെതിരെ പ്രത്യേക സംഘത്തിന്റെ അന്വേഷണം ഊര്ജിതമാക്കി. രേഖകളില് നിന്നുതന്നെ അട്ടിമറി വ്യക്തമെന്നും എസ്ഐടി ഹൈക്കോടതിയെ അറിയിച്ചു.
ഹൈക്കോടതിയില് നല്കിയ റിപ്പോര്ട്ടിലാണ് നിര്ണായക കണ്ടെത്തല്. 2019-ല് സ്വര്ണ പാളികളും കട്ടിളയും കൈമാറാന് തീരുമാനിച്ച ദേവസ്വം മിനിറ്റ്സ് ബുക്ക് എസ്ഐടി പിടിച്ചെടുത്തു. എസ്ഐടി പരിശോധനയിലാണ് നിര്ണായക രേഖകള് കിട്ടിയത്.
രേഖകള് കൈമാറുന്നതില് ബോര്ഡിന് വൈമുഖ്യമുണ്ടെന്നും നിരവധി തവണ ആവശ്യപ്പെടുമ്പോഴാണ് രേഖകള് കൈമാറുന്നതെന്നും എസ്ഐടി വ്യക്തമാക്കി. കവര്ച്ച മറയ്ക്കാന് ഇപ്പോഴത്തെ ബോര്ഡും ശ്രമിച്ചെന്ന നിഗമനത്തിലേക്ക് കോടതി എത്തിയതോടെ ദേവസ്വവും സര്ക്കാരും ഊരാക്കുടുക്കിലായി. സ്വര്ണം നഷ്ടപ്പെട്ടതിന്റെ ഉത്തരവാദികള് ആരാണെന്നതില് അന്വേഷണം തുടരുകയാണ്.
