കല്പ്പറ്റ: മുട്ടില് മരംമുറി കേസില് പ്രതികള്ക്ക് തിരിച്ചടി. ഈട്ടിത്തടികള് കണ്ടുകെട്ടിയ നടപടി വയനാട് ജില്ലാ കോടതി ശരിവച്ചു. പ്രതികളുടെ അപ്പീല് കോടതി തള്ളി.
2021ലെ ഈട്ടിക്കൊള്ളയുമായി ബന്ധപ്പെട്ടാണ് വയനാട് ജില്ലാ കോടതിയില് നിന്നും സുപ്രധാന തീരുമാനം വന്നിരിക്കുന്നത്. ഉപാധികളോടെ പട്ടയമുള്ള ഭൂമിയില് നിന്നും മുറിച്ചെടുത്ത മരങ്ങള് വനംവകുപ്പ് പിടികൂടിയിരുന്നു. ഈ മരങ്ങള് കണ്ടുകെട്ടിയതിനെ തുടര്ന്ന് ഈ നടപടി റദ്ദാക്കണമെന്ന് ആവശ്യപ്പെട്ട് പ്രതികള് കോടതിയെ സമീപിച്ചിരുന്നു. ഈ അപ്പീലാണ് ഇപ്പോള് വയനാട് ജില്ലാ കോടതി തള്ളിയിരിക്കുന്നത്. സര്ക്കാരിലേക്ക് വന്ന് ചേരേണ്ട മരങ്ങളാണിതെന്നും അപ്പീല് നിലനില്ക്കില്ലെന്നുമാണ് കോടതി നിരീക്ഷിച്ചിരിക്കുന്നത്.
2020 – 21 വര്ഷത്തില് വയനാട് മുട്ടിലില് നടന്ന കോടികളുടെ അനധികൃത മരംമുറി കേസില് രണ്ടുവര്ഷം നീണ്ട അന്വേഷണത്തിനു ശേഷമാണ് അന്വേഷണ സംഘം കുറ്റപത്രം സമര്പ്പിക്കുന്നത്. വയനാട് വാഴവറ്റ സ്വദേശികളും റിപ്പോര്ട്ടര് ചാനല് ഉടമകളുമായ റോജിഅഗസ്റ്റിന്, ആന്റോ അഗസ്റ്റിന്, ജോസൂട്ടി അഗസ്റ്റിന് എന്നിവരാണ് കേസിലെ മുഖ്യപ്രതികള്. വ്യാജരേഖ ചമയ്ക്കല്, പൊതുമുതല് നശിപ്പിക്കല്, വഞ്ചന തുടങ്ങിയ കുറ്റങ്ങള്ക്കൊപ്പം സര്ക്കാറിലേക്ക് നിക്ഷിപ്തമായ മരങ്ങള് മുറിച്ചതിന് ലാന്ഡ് കണ്സര്വന്സി ആക്ടും പ്രതികള്ക്കെതിരെ ചുമത്തിയിട്ടുണ്ട്. അന്നത്തെ മുട്ടില് സൗത്ത് വില്ലേജ് ഓഫീസറും സ്പെഷ്യല് ഓഫീസറും മരംമുറിസംഘത്തെ സഹായിച്ചവരുമുള്പ്പടെ കേസില് ആകെ 12 പ്രതികളാണുള്ളത്.
