ദഹ്റാന്‍: സൗദിയിലെ ദഹ്റാന്‍ അരാംകോ കെട്ടിടത്തിന് നേരെ ഹൂതി ആക്രമണം. റിയാദിനെയും തെക്കന്‍ മേഖലയെയും ലക്ഷ്യമിട്ടെത്തിയ 6 ഡ്രോണുകള്‍ സൗദി തകര്‍ത്തു. റിയാദില്‍ മിസൈലുകളുടെ അവശിഷ്ടങ്ങള്‍ വീണ് 4 പേര്‍ക്ക് പരിക്കേറ്റു. 15 വീടുകള്‍ക്ക് നാശനഷ്ടങ്ങളുണ്ടായി.
ദഹ്റാന്‍ അരാംകോ കെട്ടിടത്തിന് നേരെയുണ്ടായ ആക്രമണത്തില്‍ ആളപായമില്ലെന്ന് ഊര്‍ജ മന്ത്രാലയം സ്ഥിരീകരിച്ചു. രാത്രി കിഴക്കന്‍ സൗദിയിലെ അരാംകോ കോംപ്ലക്സിന് നേരെയാണ് ആക്രമണമുണ്ടായത്. മുകളിലെ മൂന്ന് നിലകളില്‍ തീ പടര്‍ന്നെങ്കിലും ഉടന്‍ തന്നെ ഇത് നിയന്ത്രണ വിധേയമാക്കാന്‍ സാധിച്ചതായി കമ്പനി അധികൃതര്‍ റോയിട്ടേഴ്സിനോട് പറഞ്ഞു. ലോകത്തിലെ ഏറ്റവും വലിയ എണ്ണ കമ്പനിയുടെ ഏറ്റവും പ്രധാനപ്പെട്ട കെട്ടിടങ്ങളെ ലക്ഷ്യംവച്ചാണ് ഹൂതികള്‍ ആക്രമണം പദ്ധതിയിട്ടത്.
ഹൂതികളുടെ ആക്രമണങ്ങളെ ഫലപ്രദമായി പ്രതിരോധിക്കാന്‍ സാധിച്ചതായി സൗദി അറിയിച്ചു. അല്‍ ഖര്‍ജില്‍ ഹൂതികളുടെ ഒരു ക്രൂയിസ് മിസൈല്‍ തകര്‍ത്തു. റിയാദിനെയും തെക്കന്‍ മേഖലയെയും ലക്ഷ്യമിട്ടെത്തിയ 6 ഡ്രോണുകളും തകര്‍ത്തു.റിയാദിനെ ലക്ഷ്യമിട്ടെത്തിയ മൊത്തം 4 ക്രൂയിസ് മിസൈലുകള്‍ സൗദി വ്യോമസേന തകര്‍ത്തു.റിയാദില്‍ മിസൈലുകളുടെ അവശിഷ്ടങ്ങള്‍ വീണ് രണ്ട് സ്ത്രീകള്‍, ഒരു പുരുഷന്‍, ഒരു കുട്ടി എന്നിവരുള്‍പ്പെടെ 4 പേര്‍ക്ക് പരിക്കേറ്റു.15 വീടുകള്‍ക്ക് നിസ്സാര നാശനഷ്ടങ്ങള്‍ സംഭവിച്ചു.
