തിരുവനന്തപുരം: ഗവ. മെഡിക്കല് കോളേജില് തീപിടുത്തം. മള്ട്ടി സ്പെഷ്യാലിറ്റി ബ്ലോക്കിലെ അത്യാഹിത വിഭാഗത്തിലാണ് തീപിടുത്തം ഉണ്ടായത്. അത്യാഹിത വിഭാഗത്തിലെ പോര്ട്ടബിള് വെന്റിലേറ്റര് മെഷീന് ആണ് കത്തിയതെന്നാണ് വിവരം. തീപിടുത്തത്തെ തുടര്ന്ന് ഐസിയുവില് ഉള്ള രോഗികളെയും സ്റ്റാഫിനെയും മാറ്റി. ഷോര്ട്ട് സര്ക്യൂട്ട് മൂലമാണ് തീപിടുത്തമുണ്ടായതെന്നാണ് സംശയം. ഈ ബ്ലോക്കില് നിരവധി രോഗികളുണ്ടായിരുന്നുവെന്നാണ് വിവരം. അതേസമയം, തീപിടുത്തം നിയന്ത്രണ വിധേയമായെന്ന് മെഡിക്കല് കോളേജ് ആശുപത്രി അധികൃതര് അറിയിച്ചു. വെന്റിലേറ്ററില് ഓക്സിജന് ലീക്ക് ആയി പുക ഉയരുകയായിരുന്നു. തീ നിയന്ത്രണ വിധേയമായെങ്കിലും പുക മാത്രമാണ് നിലവിലുള്ളത്. ഇത് രോഗികള്ക്ക് ബുദ്ധിമുട്ടായതോടെ എല്ലാ രോഗികളേയും മാറ്റുകയായിരുന്നു. നിലവില് ഒഴിപ്പിച്ച രോഗികള്ക്ക് വിശദ പരിശോധന നടത്തിവരികയാണ്.
തിരുവനന്തപുരം മെഡിക്കല് കോളേജിലെ അഗ്നിബാധ നിയന്ത്രണവിധേയമാക്കി
