തൃശൂര്: തൃശൂരിലെ പുഴയ്ക്കലില് ലുലു മാള് നിര്മ്മാണത്തിന് തടസ്സം നിന്ന്് ഭരണപക്ഷത്തെ ഒരു രാഷ്ട്രീയപാര്ട്ടിയെന്ന ലുലു ഗ്രൂപ്പ് ചെയര്മാന് എം എ യൂസഫലിയുടെ ആരോപണം വിവാദമായി. ലുലുമാളിന്റെ നിര്മാണം സാങ്കേതികത്വത്തില് കുടുങ്ങി അനിശ്ചിതമായി നീളുകയാണ്. രണ്ടരവര്ഷം മുന്പ് പ്രവര്ത്തനം ആരംഭിക്കേണ്ട മാളിന്റെ തുടര്പ്രവര്ത്തനവുമായി മുന്നോട്ട് പോകാന് കഴിയാത്തത് ഒരു രാഷ്ട്രീയ പാര്ട്ടിയിലുള്ള നേതാവ് അനാവശ്യമായ കേസുമായി മുന്നോട്ട് പോകുന്നതിനാലാണെന്നും 3000 പേര്ക്ക് ജോലി ലഭിക്കേണ്ട വലിയ പ്രോജക്ടാണ് തൃശൂരിലെ ലുലു ഷോപ്പിങ്ങ് മാളിലൂടെ മുന്നോട്ട് വെച്ചതെന്നും യൂസഫലി ചൂണ്ടിക്കാട്ടി ചിയ്യാരത്ത് തൃശ്ശൂര് മാനേജ്മെന്റ് അസോസിയേഷന് ആസ്ഥാനമന്ദിരം ഉദ്ഘാടനം ചെയ്ത് സംസാരിക്കുമ്പോഴായിരുന്നു യൂസഫലിയുടെ വിവാദ പരാമര്ശം.
ലുലുമാളിന്റെ നിര്മ്മാണത്തിനെതിരെ പരാതി നല്കിയത് സിപിഐ വരന്തരപ്പിള്ളി മുന് ലോക്കല് സെക്രട്ടറി ടി എന് മുകുന്ദനാണെന്നാണ് റിപ്പോര്ട്ട് പരാതി നല്കിയത് വ്യക്തിപരമായാണെന്നാണ് മുകുന്ദന്റെ വിശദീകരണം. പാര്ട്ടിക്കതില് പങ്കില്ല. താന് പാര്ട്ടി അംഗമാണ്. നെല്വയല് പരിവര്ത്തനപ്പെടുത്തിയതിനെതിരെയാണ് പരാതി നല്കിയത്. സമ്പന്നനും സാധാരണക്കാരനും ഒരേ നീതി വേണം എന്ന് കരുതിയാണ് കേസു നടത്തുന്നത്. ഹൈക്കോടതിയില് വാദം പൂര്ത്തിയായി വിധി പറയാനായി വച്ചിരിക്കുകയാണെന്നും മുകുന്ദന് പറഞ്ഞു.
മാള് നിര്മ്മിക്കാന് സ്ഥലം ഏറ്റെടുത്ത് പ്രവര്ത്തനം തുടങ്ങിയ ഘട്ടത്തിലാണ് ലുലുവിനെതിരെ കേസ് കൊടുത്തത്. ഈ രാജ്യത്ത് ബിസിനസ് സംരംഭം മുന്നോട്ട് പോകണമെങ്കില് പല തരത്തിലുള്ള പ്രതിസന്ധികളെ അഭിമുഖീകരിക്കേണ്ടി വരുമെന്നും ആ തടസ്സങ്ങള് മാറിയാല് തൃശൂരില് ലുലുവിന്റെ മാള് എത്തുമെന്നും അദ്ദേഹം കൂട്ടിച്ചേര്ത്തു.
ഒരുപാട് ബിസിനസുകാരുടെ പാദസ്പര്ശം കൊണ്ട് അനുഗ്രഹീതമാണ് തൃശൂര്. കേരളത്തിലെ എല്ലാ അറിയപ്പെടുന്ന ബിസിനസുകാരും തൃശൂരിന്റെ സംഭാവനയാണെന്നും അദ്ദേഹം ഓര്മിപ്പിച്ചു. ബിസിനസും വളര്ച്ചയുമായി മുന്നേറുമ്പോഴും മാതാപിതാക്കളെ സംരക്ഷിക്കേണ്ടതിന്റെ ആവശ്യകതയും അദ്ദേഹം സദസിലിരിക്കുന്ന കുട്ടികളോട് വ്യക്തമാക്കി.
