കൊച്ചി: സ്ത്രീത്വത്തെ അപമാനിച്ചുവെന്ന കേസില് നടന് ഉണ്ണി മുകുന്ദന്
എതിരായ തുടര്നടപടികള് ഹൈക്കോടതി സ്റ്റേ ചെയ്തു. കേസ് റദ്ദാക്കണമെന്നാവശ്യപ്പെട്ട് ഉണ്ണി മുകുന്ദന് നല്കിയ ഹര്ജിയിലാണിത്. കേസില് പരാതിക്കാരിയുമായി ഒത്തുതീര്പ്പായെന്ന് ഉണ്ണി മുകുന്ദന് കോടതിയെ അറിയിച്ചതിനെ തുടര്ന്നാണ് സ്റ്റേ ലഭിച്ചത്. ജസ്റ്റിസ് കെ ബാബുവാണ് കേസ് സ്റ്റേ ചെയ്തത്.
മജിസ്ട്രേറ്റ് കോടതിയില് യുവതി നല്കിയ പരാതി റദ്ദാക്കണമെന്നാവശ്യപ്പെട്ടാണ് ഉണ്ണി ഹൈക്കോടതില് എത്തിയത്. നേരത്തെ, ഈ കേസ് റദ്ദാക്കണമെന്നാവശ്യപ്പെട്ട് ഉണ്ണി മുകുന്ദന് മജിസ്ട്രേറ്റ് കോടതിയിലും സെഷന്സ് കോടതിയിലും ഹര്ജികള് നല്കിയിരുന്നു. രണ്ടിടത്തും ഹര്ജികള് തള്ളുകയാണ് ഉണ്ടായത്. തുടര്ന്നാണ് അദേഹം ഹൈക്കോടതിയെ സമീപിക്കുന്നത്. കേസില് വിചാരണ തടഞ്ഞുകൊണ്ടുള്ള ഉത്തരവ് നേരത്തെ ഹൈക്കോടതി നീക്കിയിരുന്നു.
കാണാനെത്തിയപ്പോള് ലൈംഗികമായി ആക്രമിക്കുക, സ്ത്രീത്വത്തെ അപമാനിക്കുക തുടങ്ങിയ ലക്ഷ്യങ്ങളോടെ മോശമായി പെരുമാറിയെന്നാണ് പരാതി. കേസ് പിൻവലിച്ചിട്ടില്ല എന്ന് പരാതിക്കാരി ഫെബ്രുവരിയിൽ കോടതിയെ അറിയിച്ചതിനാൽ വിചാരണ നടപടികൾ തുടരാൻ കോടതി ആവശ്യപ്പെട്ടിരുന്നു. പരാതിക്കാരിയുമായി ഒത്തുതീർപ്പായി എന്ന് വീണ്ടും ഉണ്ണിമുകുന്ദൻ കോടതിയിൽ അറിയിച്ചതിനെ തുടർന്നാണ് പുതിയ ഉത്തരവ്.
