കൊച്ചി: സിഎംആര്എല്-എക്സാലോജിക് ഇടപാടിലെ എന്ഫോഴ്സ്മെന്റ് ഡയറക്ടറേറ്റിന്റെ അന്വേഷണത്തിന് സ്റ്റേ ഇല്ല. ഹര്ജിയില് മുഴുവന് വാദം കേട്ട് തീരുമാനമെടുക്കാമെന്ന് കോടതി വ്യക്തമാക്കി. അന്വേഷണം സ്റ്റേ ചെയ്യണമെന്നായിരുന്നു സിഎംആര്എല്ലിന്റെ ആവശ്യം. ഹൈക്കോടതി ഡിവിഷന് ബെഞ്ചിന്റേതാണ് നടപടി.
എഫ്ഐആറോ കുറ്റകൃത്യമോ ഇല്ലാതെ ഇഡി അന്വേഷണം തുടങ്ങിയെന്നും അധികാരപരിധി മറികടന്നാണ് ഇഡിയുടെ അന്വേഷണമെന്നുമായിരുന്നു സിഎംആര്എല് വാദങ്ങള്. ഇഡിയുടെ സമന്സിന് അന്വേഷണ സ്വഭാവമെന്നും സിഎംആര്എല് കോടതിയില് പറഞ്ഞു.
ജസ്റ്റിസുമാരായ രാജ വിജയരാഘവന്, കെ വി ജയകുമാര് എന്നിവരുടെ ബെഞ്ചാണ് ഹര്ജി പരിഗണിച്ചത്.. ഹര്ജിയെ ഇ ഡി അതിശക്തമായി എതിര്ത്തു.. ഇ ഡിയ്ക്ക് വേണ്ടി അഡിഷണല് സോളിസിറ്റര് ജനറല് ഹാജരായി.റെയ്ഡില് ലഭിച്ച തെളിവുകളും ഇ ഡി ഉദ്യോഗസ്ഥര്ക്കെതിരെയുള്ള ആക്രമണങ്ങളും ഹൈക്കോടതിയില് അറിയിച്ചു.
നീതിനിഷേധം ഉണ്ടായെന്നാണ് സിഎംആര്എല്ലിന്റെ വാദം. സിംഗിള് ബെഞ്ചിന്റെ ഉത്തരവ് സ്റ്റേ ചെയ്ത പുതിയ അപ്പീലില് വാദം കേള്ക്കണമെന്നാണ് ആവശ്യം. ഇ ഡി അന്വേഷണം തുടരാമെന്ന സിംഗിള് ബെഞ്ചിന്റെ ഉത്തരവ് സ്റ്റേ ചെയ്യണമെന്നും സിഎംആര്എല് ഹൈക്കോടതിയില് ആവശ്യപ്പെട്ടു.
ഇ ഡി അന്വേഷണം തുടരാമെന്ന ഹൈക്കോടതിയുടെ ഉത്തരവിനെ തുടര്ന്നാണ് പ്രതിപക്ഷ നേതാവ് പിണറായി വിജയന്റെ വീട് ഉള്പ്പെടെയുള്ള 12 ഇടങ്ങളില് ഇ ഡി റെയ്ഡ് നടത്തിയത്. എന്നാല് സിപിഎം പ്രവര്ത്തകര് ഇ ഡി ഉദ്യോഗസ്ഥരെ ആക്രമിക്കാന് ശ്രമിക്കുകയും അവര് എത്തിയ കാര് നശിപ്പിക്കുകയും ചെയ്തതിലും കേസ് നടക്കുകയാണ്. റെയ്ഡ് കഴിഞ്ഞ് മടങ്ങിയ ഇഡി ഉദ്യോഗസ്ഥരെ ആക്രമിച്ച കേസില് തുടര് നടപടികള് വേഗത്തിലാക്കാനാണ് പൊലീസിന്റെ നീക്കം. കുറ്റപത്രം ഉള്പ്പെടെയുള്ള കാര്യങ്ങള് വേഗത്തില് നല്കി പ്രതികള്ക്ക് ജാമ്യം ലഭിക്കുന്നത് തടയാനാണ് പോലീസ് ശ്രമിക്കുന്നത്. ഇന്നലെ അറസ്റ്റിലായ എസ്.എഫ്.ഐ ജില്ലാ പ്രസിഡന്റ് ഉള്പ്പടെ കേസില് ഇതുവരെ അറസ്റ്റിലായവര് 26 പേരാണ്.
