പത്തനംതിട്ട: കാപ്പാ കേസ് പ്രതിക്ക് ഉള്പ്പെടെ വിവരം ചോര്ത്തി നല്കിയ സംഭവത്തില് എഎസ്ഐയെ സസ്പെന്ഡ് ചെയ്തു. . തിരുവല്ല പൊലീസ് സ്റ്റേഷനില് ജോലി ചെയ്തിരുന്ന എഎസ്ഐ ബിനു കുമാറിനെയാണ് അന്വേഷണ വിധേയമായി സസ്പെന്ഡ് ചെയ്തത്. കോടതിയില് ഹാജരാക്കുന്നതിന് മുന്പ് പ്രതികള്ക്ക് ജാമ്യം കിട്ടാന് സഹായിക്കുന്ന രീതിയില് റിമാന്ഡ് റിപ്പോര്ട്ട് വിവരം ഉള്പ്പെടെ ചോര്ത്തി നല്കിയെന്നാണ് കണ്ടെത്തല്. ഇതുസംബന്ധിച്ച വിവരത്തെതുടര്ന്ന് ഡിഐജി അജിതാ ബീഗമാണ് സസ്പെന്ഡ് ചെയ്തത്.
ബാറില് അടിപിടിയുണ്ടാക്കിയ കേസില് ബെംഗളൂരുവിലെത്തി പ്രതികളെ പിടികൂടിയിരുന്നു. ഇവരെ കോടതിയില് ഹാജരാക്കാന് എത്തിക്കുമ്പോള് റിമാന്ഡ് റിപ്പോര്ട്ട് സമര്പ്പിക്കും. രണ്ടു പകര്പ്പുകളാണ് സമര്പ്പിക്കുക. കോടതി നടപടികള്ക്കുശേഷമാണ് റിമാന്ഡ് റിപ്പോര്ട്ടിന്റെ പകര്പ്പ് പ്രതികളുടെ അഭിഭാഷകന് കൈമാറുക. എന്നാല്, കോടതിയിലെത്തിച്ചപ്പോള് തന്നെ റിമാന്ഡ് റിപ്പോര്ട്ടുകളിലൊന്ന് കാണാതാവുകയായിരുന്നു. തുടര്ന്ന് നടത്തിയ അന്വേഷണത്തിലാണ് കോടതി നടപടിക്ക് മുന്പേ തന്നെ റിമാന്ഡ് റിപ്പോര്ട്ടിന്റെ പകര്പ്പ് പ്രതികളുടെ അഭിഭാഷകന് എഎസ്ഐ ബിനുകുമാര് കൈമാറിയ വിവരം വ്യക്തമായത്. സംഭവത്തെതുടര്ന്ന് എഎസ്ഐയെ ആദ്യഘട്ടത്തില് എആര് ക്യാമ്പിലേക്ക് സ്ഥലം മാറ്റിയിരുന്നു. പ്രതികളുടെ അഭിഭാഷകന്റെ കയ്യില് നിന്ന് പണം വാങ്ങിയാണ് ഇത്തരത്തില് വിവരം ചോര്ത്തി നല്കിയിരുന്നതെന്നാണ് കണ്ടെത്തല്. തിരുവനന്തപുരം സ്വദേശിയായ ബിനു കുമാറിനെതിരെ കൂടുതല് നടപടിക്കായി വിശദമായ അന്വേഷണത്തിന് ഉത്തരവിട്ടിട്ടുണ്ട്.
കാപ്പാ കേസ് പ്രതിക്ക് ഉള്പ്പെടെ വിവരം ചോര്ത്തി നല്കി, എഎസ്ഐയ്ക്ക് സസ്പെന്ഷന്
