മുംബൈ: മഹാരാഷ്ട്രയില് കനത്ത മഴ തുടരുന്നു. ദുരിതം വിതച്ച മഴയില് മുംബൈ-പുണെ നഗരങ്ങള് തമ്മിലുള്ള ഗതാഗത സംവിധാനങ്ങള് പൂര്ണമായും നിലച്ചു. തുടര്ച്ചയായ മഴയെത്തുടര്ന്നുണ്ടായ ഉരുള്പൊട്ടലിലും വെള്ളപ്പൊക്കത്തിലും ട്രെയിന് സര്വീസുകള് നിര്ത്തിവെക്കുകയും മുംബൈ-പുണെ എക്സ്പ്രസ് വേയും പഴയ ഹൈവേയും അടച്ചിടുകയും ചെയ്തു. ഇതോടെ ഇരുനഗരങ്ങള്ക്കിടയിലുള്ള യാത്രാബന്ധം വിച്ഛേദിക്കപ്പെട്ടു. മുംബൈയില് കനത്ത മഴയെത്തതുടര്ന്ന് മാന്ഗുര്ദ് പ്രദേശത്ത് കെട്ടിടം തകര്ന്നു വീണ് അഞ്ച് കുട്ടികളടക്കം ആറ് പേര് മരണപ്പെട്ടു. ഇന്നലെ രാത്രി 8.30-ഓടെ മാന്ഖുര്ദിലെ ജനതാ നഗറിലുളള മൂന്ന് നില വാടക കെട്ടിടമാണ് തകര്ന്നത്. കനത്ത മഴയെത്തുടര്ന്ന് കെട്ടിടത്തിന്റെ ഒരു ഭാഗം പെട്ടെന്ന് തകര്ന്നു വീഴുകയായിരുന്നു. അപകടത്തില് പരിക്കേറ്റ ഒരാള് ഇപ്പോള് ആശുപത്രിയില് ചികിത്സയിലാണ്. മരിച്ചവരില് സ്ത്രീകളും കുട്ടികളും ഉണ്ടെന്നാണ് വിവരം. ഇനിയും ആളുകള് കെട്ടിടഅവശിഷ്ടങ്ങള്ക്കിടയില് കുടുങ്ങിക്കിടക്കുന്നുണ്ടെന്ന സംശയത്തെ തുടര്ന്ന് ഫയര്ഫോഴ്സിന്റേയും, മുംബൈ പോലീസിന്റേയും നേതൃത്വത്തില് പ്രദേശത്ത് രക്ഷാപ്രവര്ത്തനം പുരോഗമിക്കുകയാണ്. കനത്ത മഴ രക്ഷാപ്രവര്ത്തനത്തിന് കടുത്ത തടസ്സം സൃഷ്ടിക്കുന്നുണ്ട്. മുംബൈയില് പലയിടങ്ങളിലും റെഡ് അലര്ട്ട് പ്രഖ്യാപിച്ചിരിക്കുന്ന സാഹചര്യത്തില് വിമാന സര്വീസുകള് തടസ്സപ്പെടുകയും റോഡുകളില് വെള്ളപ്പൊക്കമുണ്ടാകുകയും ചെയ്തിട്ടുണ്ട്.
മുംബൈ സ്തംഭിച്ചു
