തൃശൂര്‍: തൃശൂരിലെ തോല്‍വിയുമായി ബന്ധപ്പെട്ട കെ.പി.സി.സി അന്വേഷണ റിപ്പോര്‍ട്ടിലെ വിവരങ്ങള്‍ പുറത്തായ സംഭവത്തില്‍ കോണ്‍ഗ്രസ് നേതൃത്വം ആഭ്യന്തര അന്വേഷണം തുടങ്ങിയതായി റിപ്പോര്‍ട്ട്.
വാര്‍ത്തയും വിശദാംശങ്ങളും ഇന്നലെ പുലര്‍ച്ചെയാണ് മാധ്യമങ്ങള്‍ക്ക് ലഭിക്കുന്നത്. എന്നാല്‍ ഞായറാഴ്ച രാത്രി തന്നെ ഇങ്ങനെയൊരു റിപ്പോര്‍ട്ടിന്റെ പകര്‍പ്പ് പുറത്ത് വന്നെന്നും അത് വ്യാജമാണെന്നും വ്യക്തമാക്കിക്കൊണ്ട് റിപ്പോര്‍ട്ടിന്റെ കോപ്പി സാമൂഹ്യ മാധ്യമങ്ങളില്‍ വന്നിരുന്നു.
റിപ്പോര്‍ട്ടിലെ വിവരങ്ങള്‍ ബി.ജെ.പി- കോണ്‍ഗ്രസ് അവിശുദ്ധബന്ധം വ്യക്തമാക്കുന്നതെന്ന് എല്‍.ഡി.എഫ് ജില്ലാ കമ്മിറ്റി പ്രതികരിച്ചു. അനില്‍ അക്കരെയും, ജോസ് വള്ളൂരും കേന്ദ്രസര്‍ക്കാരിന്റെ പ്രചാരകരെന്നും എല്‍.ഡി.എഫ് ജയിക്കാതിരിക്കാന്‍ പലയിടത്തും കോണ്‍ഗ്രസ് വോട്ട് സുരേഷ് ഗോപിക്ക് നല്‍കിയെന്നും ആരോപണമുണ്ട്. വഞ്ചനാപരമായ നിലപാട് സ്വീകരിച്ച ടി എന്‍ പ്രതാപന്‍ ഇപ്പോള്‍ കെ.പി.സി.സി വര്‍ക്കിംഗ് പ്രസിഡന്റെന്നും റിപ്പോര്‍ട്ടിലെ വിവരങ്ങള്‍ പുറത്തുവന്ന സാഹചര്യത്തില്‍ സ്ഥാനം രാജിവയ്ക്കണമെന്നും ജില്ലാ കമ്മറ്റി പുറത്തുവിട്ട പ്രസ്താവനയില്‍ പറയുന്നു. രാജിക്ക് തയ്യാറല്ലെങ്കില്‍ ടി എന്‍ പ്രതാപനെ പുറത്താക്കണമെന്നും എല്‍ഡിഎഫ് ആവശ്യപ്പെട്ടു.
