റിപ്പോ നിരക്കുയര്‍ത്തി റിസര്‍വ് ബാങ്ക്, ഭവന-വാഹന വായ്പയെടുത്തവര്‍ക്ക് പലിശ ഭാരം കൂടും

ദില്ലി: റിപ്പോ നിരക്ക് കൂട്ടി റിസര്‍വ് ബാങ്ക്. 25 ബേസിസ് പോയിന്റ് കൂട്ടി നിരക്ക് 5.50 ശതമാനമായി ഉയര്‍ത്തി. റിപ്പോ നിരക്ക് കൂട്ടിയതോടെ ഭവന, വാഹന വായ്പകളുടെ പലിശ നിരക്കുയരും. റിസര്‍വ് ബാങ്കിന്റെ വായ്പാ നയ പ്രഖ്യാപനത്തിലാണ് നിരക്ക് കൂട്ടിയതായി അറിയിച്ചത്. മൂന്ന് വര്‍ഷത്തിന് ശേഷമാണ് റിപ്പോ നിരക്കില്‍ വര്‍ധനവുണ്ടാകുന്നത്. റിപ്പോ നിരക്ക് നിലവിലെ 5.25 ല്‍ നിന്നാണ് 5.50 ആക്കി ഉയര്‍ത്തിയത്. ഇതോടെ വായ്പയെടുത്തവരുടെ ഇഎംഐ ഭാരം കൂടും.
2025-ല്‍ 125 ബേസിസ് പോയിന്റുകള്‍ നിരക്കുകള്‍ കുറച്ചതിന് ശേഷം തുടര്‍ച്ചയായ നാല് പോളിസി മീറ്റിംഗുകളില്‍ സെന്‍ട്രല്‍ ബാങ്ക് റിപ്പോ നിരക്ക് 5.25 ശതമാനമായി നിലനിര്‍ത്തിയിരുന്നു. വര്‍ധിച്ചുവരുന്ന പണപ്പെരുപ്പ അപകടസാധ്യതകളും ക്രൂഡ് ഓയില്‍ വിലയിലെ വര്‍ധനവും സെന്‍ട്രല്‍ ബാങ്ക് പണ നിയന്ത്രണത്തിലേക്ക് മാറുമെന്ന പ്രതീക്ഷകളെ ശക്തിപ്പെടുത്തുന്നതിനിടയിലാണ് ഏറ്റവും പുതിയ ആര്‍ബിഐ എംപിസി യോഗം ചേര്‍ന്നത്. 2027 സാമ്പത്തിക വര്‍ഷത്തില്‍ കൂടുതല്‍ വര്‍ധനവ് വരുത്തുമെന്നുമാണ് സാമ്പത്തിക വിദഗ്ധര്‍ നല്‍കുന്ന സൂചന.