പരീക്ഷണയോട്ടം തിരുവനന്തപുരത്ത് നിന്ന് 22ന്
കൊച്ചി: കേരളത്തിന് കേന്ദ്രസര്ക്കാരിന്റെ വിഷുക്കൈനീട്ടമായ വന്ദേഭാരത് ട്രെയിന് ദക്ഷിണ റെയില്വേയ്ക്ക് കൈമാറി. 16 കാറുകളുള്ള രണ്ട് റേക്കുകളാണ് കേരളത്തിന് കൈമാറിയത്. ചെന്നൈ വില്ലിവാക്കത്ത് നിന്ന്, തിരുവനന്തപുരത്ത് നിന്നുള്ള റെയില്വേ അധികൃതര് ട്രെയിന് എറ്റെടുത്തു. ട്രാക്ക് ക്ലിയറന്സ് കിട്ടുന്നതിന് അനുസരിച്ച് എഗ്മോര് നാഗര്കോവില് വഴി കേരളത്തിലേക്ക് കൊണ്ടുവരും. തിരുവനന്തപുരത്ത് നിന്ന് ട്രെയിന് പരീക്ഷണയോട്ടം നടത്തും. ഈ മാസം 22ന് പരീക്ഷണയോട്ടം നടത്താനാണ് സാധ്യത.
കേരളത്തിലെത്തുന്ന പ്രധാനമന്ത്രി നരേന്ദ്ര മോദി ഏപ്രില് 25ന് വന്ദേഭാരത് ഫ്ളാഗ് ഓഫ് ചെയ്യും. തിരുവനന്തപുരം, കൊല്ലം, കോട്ടയം, എറണാകുളം ടൗണ്, തൃശൂര്, തിരൂര്, കോഴിക്കോട്, കണ്ണൂര് എന്നിങ്ങനെയാണ് സ്റ്റോപ്പുകള് ലഭിക്കുന്ന വിവരം. എന്നാല് സമയക്രമവും സ്റ്റോപ്പുകളും റയില്വേ മന്ത്രാലയം അന്തിമമായി നോട്ടിഫൈ ചെയ്യും. വന്ദേ ഭാരത് എക്സ്പ്രസ് പാലക്കാട് വഴിയാണ് കേരളത്തിലേക്ക് കൊണ്ടുവരുന്നത്. ഇന്ന് രാത്രിയോടെ തിരുവനന്തപുരത്തേക്ക് വന്ദേ ഭാരത് എത്തുമെന്ന് പ്രതീക്ഷിക്കുന്നതായി തിരുവനന്തപുരം ഡിവിഷന് അറിയിച്ചു.
