കൊച്ചി: ക്രൂരകൊലപാതകത്തിന്റെ ഞെട്ടലിലാണ് വര്ക്കല വടശ്ശേരിക്കോണം ദേശക്കാര്. വിവാഹത്തലേന്ന് വധുവിന്റെ അച്ഛനെ അക്രമിസംഘം മണ്വെട്ടിക്കൊണ്ട് അടിച്ചുകൊന്നു. വധുവിനെ കൊലപ്പെടുത്തുകയായിരുന്നു നാലംഗ അക്രമിസംഘത്തിന്റെ ലക്ഷ്യം.
വടശ്ശേരിക്കോണത്ത് ശ്രീലക്ഷ്മിയില് രാജു (61) ആണ് കൊല്ലപ്പെട്ടത്. ഇന്ന് ശിവഗിരിയില് വച്ച് മകള് ശ്രീലക്ഷ്മിയുടെ വിവാഹം നടക്കാനിരിക്കെയാണ് രാജു കൊല്ലപ്പെടുന്നത്. കൊല്ലപ്പെട്ട രാജു ഗള്ഫില് നിന്ന് മടങ്ങി വന്ന ശേഷം നാട്ടില് ഓട്ടോ ഡ്രൈവര് ആയി ജോലി ചെയ്യുക ആയിരുന്നു. സംഭവുമായി ബന്ധപ്പെട്ട് അയല്വാസികളായ നാല് പേരെ പൊലീസ് അറസ്റ്റ് ചെയ്തു,
വടശ്ശേരിക്കോണം സ്വദേശിയായ ജിഷ്ണു, ജിജിന്, ശ്യം, മനു എന്നിവരുള്പ്പെട്ട നാലുപേരെയാണ് വര്ക്കല പൊലീസ് പിടികൂടിയത്. വിവാഹ തലേദിവസമായ ഇന്നലെ രാത്രി ഏകദേശം ഒരു മണിയോടുകൂടി പെണ്കുട്ടിയുടെ സുഹൃത്തായിരുന്ന ജിഷ്ണു സഹോദരന് ജിജിന് എന്നിവരുള്പ്പെട്ട നാലംഗ സംഘമാണ് വിവാഹ വീട്ടില് എത്തി ബഹളം വെച്ചത്. വിവാഹ തലേന്നത്തെ ആഘോഷ പാര്ട്ടി തീര്ന്നതിനു പിന്നാലെയാണ് സംഘം എത്തിയത്. കാറില് ഉച്ചത്തില് പാട്ട് വെച്ച് ആദ്യം ബഹളം ഉണ്ടാക്കി. പിന്നീട് കല്യാണ വീട്ടിലേക്കെത്തി.
വധുവായ ശ്രീലക്ഷ്മിയും ജിഷ്ണുവും തമ്മില് നേരത്തെ അടുപ്പത്തിലായിരുന്നു. എന്നാല് പിന്നീട് ഈ അടുപ്പം പെണ്കുട്ടി അവസാനിപ്പിച്ചിരുന്നു. അപ്രതീക്ഷിതമായാണ് ജിഷ്ണുവും സഹോദരനും വിവാഹ വീട്ടിലെത്തുന്നത്. ബഹളം വെച്ചതോടെ ശ്രീലക്ഷ്മിയുടെ പിതാവ് ഇവരെ തടഞ്ഞ് വീട്ടില് നിന്നും ഇറങ്ങിപ്പോകാന് ആവശ്യപ്പെട്ടു. വാക്കേറ്റത്തിനിടെ പ്രതികളിലൊരാള് മണ്വെട്ടി കൊണ്ട് രാജുവിനെ അടിക്കുകയായിരുന്നു.
ആക്രമണത്തിന് ശേഷം ഓടി രക്ഷപ്പെട്ട പ്രതികളെ നാട്ടുകാര് ഓടിച്ചിട്ട് പിടികൂടി. തുടര്ന്ന് നാട്ടുകാര് വിവരമറിയിച്ചതിനെ തുടര്ന്ന് പൊലീസെത്തി ഇവരെ കസ്റ്റഡിയിലെടുക്കുകയായിരുന്നു. പ്രണയ നൈരാശ്യമാണ് കൊലപാതകത്തിന് പിന്നിലെന്നാണ് വര്ക്കല പൊലീസ് പറയുന്നത്. പ്രതികളെ ചോദ്യം ചെയ്തുവരികയാണെന്ന് പൊലീസ് അറിയിച്ചു
